Министерството за здравство денеска го пушти во употреба новиот јавен портал за електронска евиденција и следење на неитните, односно елективни хируршки интервенции во државните здравствени установи. Новината беше промовирана на прес-конференција од министерот за здравство Азир Алиу.
Станува збор за операции кои не се итни и не претставуваат непосредна закана по животот на пациентите, туку се планираат однапред. Во оваа категорија спаѓаат интервенции како вадење крајници, операции на кила без компликации, зафати на жолчка без акутно воспаление, како и одредени ортопедски и естетски операции – токму оние за кои најчесто постојат долги листи на чекање.
Според министерот Алиу, за првпат се воведува јасен и транспарентен систем што ќе овозможи ред, фер пристап и принцип „прв дојден – прв услужен“.
– Воспоставуваме целосно транспарентна електронска евиденција, која ќе овозможи реален увид во времето на чекање и вистинските потреби на здравствениот систем. Порталот е наменет и за граѓаните и за институциите, бидејќи преку него може да се пребарува по повеќе критериуми – специјалност, тип на интервенција, болница, лекар специјалист и број на пациенти што чекаат – истакна Алиу.
Досега, евиденцијата за ваквите операции формално се водела преку системот „Мој термин“, но анализите покажале сериозни недоследности. Дел од упатите се издавале непосредно пред операција, некои установи користеле погрешен тип упат, а во одредени случаи листите на чекање се воделе рачно, на хартија, без редовно ажурирање.
Овие пропусти, како што беше посочено, создавале искривена слика за реалното време на чекање и вистинските капацитети на здравствениот систем.
Министерот информираше дека до сите јавни здравствени установи кои вршат хируршки интервенции веќе се доставени индивидуални известувања со податоци од анализата, каде е прецизирано дали постои разлика меѓу бројот на извршени операции и бројот на евидентирани упати.
– Со воведувањето на овој портал ја унапредуваме транспарентноста, овозможуваме подобро планирање и поефикасна распределба на ресурсите, а воедно ги приближуваме домашните практики до европските стандарди – заклучи Алиу.
