Системот „Безбеден град“ и вториот ден по ред бележи голем број сообраќајни прекршоци низ државата. Како што информираат од Министерството за внатрешни работи, на 1 февруари 2026 година биле евидентирани вкупно 646 прекршоци.
Најголем дел од прекршувањата се однесуваат на пречекорување на дозволената брзина, при што системот регистрирал 582 случаи на возење побрзо од дозволеното. Од нив, дури 445 се забележани во Скопје, 36 во Тетово, 31 во Куманово, додека 70 прекршоци се регистрирани на патните коридори низ државата.
Покрај тоа, во текот на денот биле констатирани и 64 прекршоци за минување на црвено светло. Најмногу вакви случаи се регистрирани во Скопје – 35, потоа во Куманово 24 и во Тетово 5.
Како резултат на овие прекршоци, од МВР соопштуваат дека биле изречени 101 забрана за управување моторно возило. Од Министерството уште еднаш апелираат до возачите да ги почитуваат сообраќајните правила, нагласувајќи дека целта на системот „Безбеден град“ е зголемување на безбедноста и намалување на сообраќајните незгоди со тешки последици.
