Седум навивачи на грчкиот фудбалски клуб ПАОК го загубија животот во тешка сообраќајна несреќа што се случи во вторник во Романија. Возилото во кое патувале директно се судрило со камион, при што уште три лица се здобиле со тешки повреди и се хоспитализирани во критична состојба.
Според првичните информации од локалните власти, несреќата се случила при претекнување, по што комбето изгубило контрола и силно удрило во товарното возило. Ударот бил толку силен што возилото речиси целосно се распаднало.
Навивачите биле на пат кон Лион, Франција, каде требало да присуствуваат на натпреварот на ПАОК во рамки на Лига Европа.
Грчкиот премиер Кирјакос Мицотакис изрази длабоко сочувство до семејствата на загинатите и истакна дека грчката влада, заедно со амбасадата на Грција во Романија, е во постојана комуникација со романските институции со цел да се обезбеди целосна поддршка.
Од Министерството за надворешни работи на Грција соопштија дека дипломатски претставници веднаш заминале на местото на несреќата.
Инаку, навивачките групи од Грција често патуваат кон западноевропските земји преку Бугарија, Романија и Унгарија, со цел да ги избегнат долгите задржувања на границите со земјите надвор од Европската Унија.
