Зголемени концентрации на жива и сребро се утврдени во површинските води од одводниот канал кај селото Таор, покажуваат најновите лабораториски анализи на Институтот за јавно здравје. Испитувањата биле спроведени по појавата на необична бела пена во ноември минатата година, а по барање на АД „Водостопанство“.
Освен присуството на тешки метали, анализите укажуваат и на покачени вредности на нитрити, како и зголемен број на термотолерантни колиформни бактерии, што според експертите е јасен показател за сериозно загадување на водата.
Од Државниот инспекторат за животна средина предупредуваат дека детекцијата на жива е особено загрижувачка, бидејќи станува збор за супстанца што може да има тешки последици врз екосистемот и здравјето на луѓето, особено доколку рибата од овие води се користи за исхрана.
„Регистрирани се покачени концентрации на жива, што претставува сериозен ризик. Препораката на Институтот за јавно здравје е состојбата континуирано да се следи. Дополнително, забележани се и зголемени количества на сребро и нитрити“, информираат од Инспекторатот.
Според надлежните, во овој одводен канал се излеваат отпадни води од повеќе општини – Гази Баба, Илинден, Арачиново и Петровец – што укажува дека станува збор за поширок, системски проблем, а не за поединечен инцидент. Недостигот од функционална пречистителна станица во Скопје дополнително го зголемува ризикот од загадување на реките.
Белата пена во каналот била забележана на 21 ноември минатата година, веднаш по пуштањето во работа на пумпите за отпадни води од системот на Скопско Поле. Тогаш, според Инспекторатот, на терен визуелно било утврдено можно сериозно хемиско загадување на водите што се влеваат во Вардар.
Институциите најавуваат продолжување на мониторингот и дополнителни анализи, додека еколошките организации повторно апелираат за итно системско решение за третман на отпадните води во Скопскиот регион.
