Од денес, граѓаните можат целосно онлајн да добијат извод од матичната книга на родени, венчани, починати, како и потврда за слободна брачна состојба, без потреба од лично присуство на шалтер.
Министерот за дигитална трансформација, Стефан Андоновски, информираше дека сите услуги на Управата за водење матични книги се целосно интегрирани во националниот портал uslugi.gov.mk, со што постапката за нивно добивање е значително поедноставена и забрзана.
Според него, дигитализацијата овозможува граѓаните со неколку клика да ги добијат потребните документи, додека институциите добиваат подобра ефикасност и поголема контрола врз роковите за издавање.
Покрај овие услуги, денес беа промовирани и четири нови електронски услуги поврзани со здравственото осигурување. За правните лица, за првпат е достапна целосно дигитална услуга за издавање потврда за платен придонес за задолжително здравствено осигурување, која може да се користи во секое време.
Физичките лица, пак, електронски можат да добијат потврда за пријави и одјави во задолжителното здравствено осигурување, потврда за статус на осигурено или неосигурено лице, како и потврда за платен придонес.
Со овие новини, институциите најавуваат значително намалување на административните процедури и полесен пристап до јавните услуги за сите граѓани.
