Егзотичниот одмор на српската музичка ѕвезда Марија Шерифовиќ на Бали доби неочекуван пресврт. Наместо само релаксација, плажи и туристички атракции, едно блиско запознавање со локалната фауна заврши со мал, но незаборавен инцидент.
Пејачката патуваше во друштво на блиски пријателки, меѓу кои и Јована Пајиќ, а моментот што го привлече вниманието на јавноста се случил додека Марија се обидувала да направи фотографија со мајмун. Во еден миг, животното реагирало непредвидливо и ја каснало.
Настанот бил снимен и објавен на социјалните мрежи, каде Шерифовиќ, во свој препознатлив стил, сè прикажа со доза хумор и самоиронија, без драматизирање.
„Штотуку ме касна мајмун… ама среќа што е стар и што забите му се веќе тапи“, изјави таа низ смеа во видеото.
Иако ситуацијата можела да заврши и посериозно, пејачката продолжи да ужива во патувањето и редовно ги информираше фановите со снимки од плажите, прошетките и авантурите на Бали.
