Набрзо по преземањето на власта во Струмица од страна на градоначалникот Петар Јанков од ВМРО-ДПМНЕ, една од првите јавни набавки од општината отиде кај компанијата „Шалом – Фуд Груп“ ДОО, во сопственост на Јорданчо Јанев, баџанакот на премиерот Христијан Мицкоски, и Дончо Карастоев, негов прв братучед.
Компанијата беше единствен понудувач и го доби тендерот за ресторански услуги за свечениот ручек на 11 декември, по повод локалниот празник „Св. 15 Тивериополски свештеномаченици“. Вкупната вредност на договорот изнесува 400.000 денари со ДДВ, со кои се обезбеди традиционален ручек за околу 250 гости во ресторанот „Шалом“ во Струмица.
Менито, според финансиската понуда, вклучуваше пржена пастрмка, посно гравче, посна чорба, посни сарми, салата, баклава, леб, безалкохолни и алкохолни пијалаци (ракија, мастика, пиво, вино), како и кафе и чај.
На настанот присуствуваа црковни лица, директори на институции, министри од владата, а официјално соопштение објави и Комисијата за односи со верските заедници и религиозни групи. Според текстот:
„На богослужбите присутна беше директорката на Комисијата Оливера Трајковска, потпретседателот на македонското собрание Антонио Милошоски, градоначалникот на Општина Струмица Петар Јанков, покровителите на годинашната слава Јорданчо и Стевица Јаневи, советници, директори на институции и голем број верници.“
Тврдењето дека Јорданчо и Стевица Јаневи биле покровители отвора дилема, бидејќи истите се сопственици на компанијата која го доби тендерот од општинскиот буџет. Терминот „покровител“ обично имплицира дека трошоците биле покриени приватно, но реалноста покажува дека финансиите ги обезбедила општината преку јавна набавка.
Од партијата Левица реагираа бурно:
„Во време кога многу семејства се соочуваат со сиромаштија и секојдневни трошоци, овие енормни суми за елитни настани се неприфатливи. Парите на граѓаните треба да се вложуваат во социјални проекти, образование и здравство, а не во раскошни ручеци.“
Јорданчо Јанев и Дончо Карастоев беа поврзани со семејни бизниси на Мицкоски и пред тоа, кога опозицијата СДСМ ги обвинуваше за наводни коруптивни шеми во Бугарија. Според обвинувањата, Јанев управувал со ДАНО ТРАНС ЕООД во Петрич, каде наводно „вртеле“ милиони лева од македонскиот буџет, а Карастоев како прв братучед управувал со Инфинити транспорт груп. ВМРО-ДПМНЕ ги демантираше овие тврдења како „лажни вести“.
До објавувањето на овој текст, општина Струмица не доставила објаснување за улогата на Јаневи како „покровители“.
Веста и фотографијата ги споделува puls24.mk
Фото: Puls24.mk
