Фото: Ali Ahmeti/Facebook
Лидерот на Демократската унија за интеграции, Али Ахмети, денеска се обрати на протестен собир во Скопје, организиран во знак на поддршка на поранешните лидери на Ослободителната војска на Косово, кои се наоѓаат на судење во Хаг. Во својот говор, Ахмети упати благодарност до Соединетите Американски Држави, Европската Унија и НАТО за, како што рече, нивната улога во запирањето на геноцидот врз косовските Албанци.
Тој истакна дека собирот се одржува на, како што го нарече, симболично и историско место, со цел да се испрати порака дека нема да се дозволи повторно загрозување на европските вредности и слободата. Ахмети во обраќањето ги спомена и историските личности Хасан Приштина, Пјетер Богдани и Неџат Аголи, нагласувајќи дека тие оставиле длабок белег во борбата за слобода, знаење и еднаквост.
Според него, денешниот протест не бил насочен против Македонија, туку претставувал израз на поддршка за луѓе кои, како што рече, имале значајна улога во воспоставувањето мир и стабилност во регионот. Ахмети додаде дека процесите кои се водат во Хаг, според него, не ја одразуваат вистината за улогата на ОВК.
На собирот беше истакнато дека ОВК не може да се поистовети со криминална структура, туку дека нејзиното дејствување било насочено кон остварување на правата и еднаквоста на Албанците, при што, како што беше наведено, биле почитувани меѓународните норми и конвенции. Учесниците упатија апел до меѓународната заедница за, како што рекоа, фер и правично судење.
„Им се заблагодаруваме на Америка, НАТО и Европа што ја поддржаа борбата и идејата за слобода преку Ослободителната војска на Косово и што помогнаа да се сопре страдањето на нашиот народ“, порача Ахмети.
На протестот присуствуваа голем број граѓани, дел од нив обвиени со албански знамиња и симболи поврзани со ОВК. Се вееја знамиња на Албанија, Косово и САД, а дел од учесниците носеа фотографии од обвинетите поранешни команданти. Собирот помина мирно, без регистрирани инциденти, при засилено полициско обезбедување.
Во меѓувреме, премиерот Христијан Мицкоски, коментирајќи го протестот, изјави дека, според него, станува збор за политички обид за мобилизација пред партискиот Конгрес на ДУИ. Тој оцени дека ваквите чекори можат дополнително да ја изолираат партијата и да создадат впечаток на политичка нестабилност, што, според него, ќе ја отежне идната соработка со потенцијални партнери.
