Триесет и тригодишната Лора Короран од Ретфорд раскажува дека за малку ќе го загубела животот, откако при спонтан абортус ѝ било кажано да се снајде сама дома затоа што во болницата „немало слободни кревети“.
Лора вели дека носела мртва беба во себе која почнала да се распаѓа, а медицинскиот персонал ѝ соопштил дека треба самостојно да го извади и да го донесе во болницата.
По првиот спонтан абортус во 2021 година, Лора имала уште една загуба, но третата бременост – во февруари 2024 – прераснала во најтрауматичното искуство во нејзиниот живот.
По ултразвукот во шестата недела сè изгледало нормално, но само неколку дена подоцна им било кажано дека срцето на фетусот запрело. Наместо да биде задржана на набљудување, ѝ било кажано да се врати дома и да се јави повторно дури по две недели.
Лора ги молела да остане во болницата, но како одговор добила дека нема место и дека треба „природата да си го направи своето“. Таа вели дека две недели живеела со свеста дека носи мртво бебе кое полека се распаѓа додека таа се обидува да функционира.
„Ако не работиме, ставете го во фрижидер“
Кога прашала што да прави доколку абортусот се случи дома, а таа не може веднаш да стигне во болница, одговорот бил – да се обиде да го фати фетусот и да го донесе.
На прашањето што да прави ако се случи преку ноќ, ѝ било кажано да го стави во фрижидер додека да се отвори болницата.
Со огромни болки и во целосен шок, Лора користела кујнска цедилка за да го собере тоа што мислела дека е нејзиното бебе и го чувала во пластичен сад во фрижидерот.
„Секое отворање на фрижидерот ми го кршеше срцето уште малку“, вели таа.
По викендот, го однела бебето во болница – во обична најлон кеса.
Животно загрозена
Две недели подоцна состојбата нагло ѝ се влошила. Почнала обилно да крвари, изгубила повеќе од половина од вкупната количина крв во телото и итно била хоспитализирана. Добила операција и неколку трансфузии.
Набрзо потоа доживеала и исхемичен мозочен удар. Лекарите ѝ рекле дека била во сериозна животна опасност.
Лора истакнува дека персоналот во болницата во Базетло и Донкастер бил хуман и подготвен да помогне, но дека често работат во услови со минимални ресурси и премалку капацитети.
Од трагедија до иновација
Од сопственото болно искуство произлегла идеја: Лора развила прв уред наменет за жени кои доживуваат спонтан абортус дома – специјална „колевка“ за безбедно собирање на фетално ткиво.
Станува збор за пластична посуда што се поставува во тоалетната школка и преку систем за филтрација го одвојува ткивото за да може безбедно да се сочува за анализа, погреб или кремација.
Првите прототипи ги направила сама, од картонски кутии.
До денес, нејзиниот уред е воведен во 11 здравствени установи во Англија и Ирска.
ФОТО: zena.blic.rs
