Фото: ChatGPT
Американскиот претседател Доналд Трамп смета дека Украина треба да одржи избори, иако дел од медиумите пишуваат дека Киев ја користи војната за да не го направи тоа.
Како одговор на критиките, украинскиот претседател Володимир Зеленски кажа дека е подготвен да организира гласање во рок од 90 дена, но само ако западните парнери ги обезбедуваат местата каде што ќе се гласа.
Актуелните украински закони покажуваат дека не може легално да се одржат избори за време на воена состојба, но Зеленски го повика парламентот да обезбеди законски измени. Во исто време, Зеленски побара помош од западните партнери, но и САД да ги обезбедат гласачките места.
Зеленски во 2019 година победи со 73 проценти од гласовите во вториот круг против Петро Порошенко. Потоа победи и неговата партија која освои апсолутно мнозинство во парламентот, а тогаш му веруваа 80 отсто од Украинците. Таа бројка до почетокот на војната во 2022 година падна на 37 проценти, меѓутоа речиси четири години подоцна довербата е кај 60% од граѓаните.
Според друга анкета, која оваа недела ја објави „Инфо Сапиенс“, за Зеленски на претседателски избори би гласале 20,3 отсто од Украинците. Најблиску до него е поранешниот врховен командант на вооружените сили, Валериј Залужни, кој има поддршка кај 19 отсто од гласачите. Трет на списокот на потенцијални кандидати е шефот на украинската воена известувачка служба, Кирило Буданов со 5% од гласовите.
