Фото: Орце Ѓорѓиевски
Градот Скопје донесе значајна одлука во насока на зајакнување на заштитата на жртвите од семејно и родово базирано насилство. На денешната седница на Советот беше изгласана мерка со која се доделува на користење стан во сопственост на градот, кој ќе биде трансформиран во шелтер центар – безбеден и привремен дом за најранливите категории граѓани.
Во овој простор, жртвите ќе можат да добијат итно сместување, професионална психосоцијална поддршка, советување и помош сè додека нивната состојба не се стабилизира и не се пронајде соодветно трајно решение. Овој потег претставува реален доказ за решеноста на градот да создаде систем кој штити, реагира навреме и обезбедува достоинствен третман за секого.
Со воспоставувањето на овој стан како прв сопствен шелтер центар на Град Скопје, започнува имплементација на приоритетни политики насочени кон спречување на насилството, поддршка на жртвите и создавање услови за нов почеток без страв и притисок – особено за жените и децата кои најчесто се изложени на ваков ризик.
Подготвени се и сите предуслови за објавување јавен повик кон организација со докажано искуство во областа на социјалната заштита, која ќе го преземе управувањето со центарот и ќе обезбеди специјализирани услуги.
Градот истакнува дека продолжува со одговорно, транспарентно и посветено делување. Секоја жена која ќе биде заштитена, секое дете чиј живот ќе биде спасен и секое спречено насилство претставуваат заедничка победа – победа на хуманоста.
