Досега, граѓаните добиле вкупно 552 милиони денари преку мерката „Мој ДДВ“, а подготвени се налози за дополнителни 370 милиони денари, соопшти денеска директорката на Управата за јавни приходи, Елена Петрова.
Таа објасни дека кај дел од граѓаните може да има привремено одложување на исплатата, што најчесто се должи на технички причини надвор од контрола на УЈП, како на пример невалидни трансакциски сметки.
„Исплатата на ‘Мој ДДВ’ е во тек. Во овој момент се подготвуваат поврати за третиот квартал, заклучно со 30 септември. Обработката на налозите започнува по поднесување на пријавите во септември. Може да има доцнење кај оние лица чии сметки не се валидни или поради други технички пречки кои не зависат од УЈП“, истакна Петрова.
Што се однесува до повратот на ДДВ за компаниите, заклучно со вчерашниот ден реализиран е поврат од речиси 500 милиони евра. Петрова нагласи дека процесот е континуиран и дека налозите се подготвуваат за компании со ниско ризично профил, додека кај други се вршат дополнителни контроли кои можат да го продолжат процесот.
„Околу половина од дополнително утврдените даноци, кои претходно не биле правилно пресметани и пријавени од страна на даночните обврзници, се однесуваат на ДДВ. За периодот јануари-октомври имаме околу 60 милиони евра дополнително утврдени даноци, половината од нив се ДДВ. Поради тоа се вршат контроли за да се спречи неосновано исплаќање средства од буџетот“, додаде Петрова, нагласувајќи дека времетраењето на контролите зависи од големината на компанијата и понекогаш е потребно проширување на проверките.
Во однос на остварувањето на планот за наплата на даноци, Петрова посочи дека за периодот јануари-октомври реализацијата изнесува околу 99% кај ДДВ и околу 95% кај данокот на добивка. Кај данокот на личен доход, каде што наплатата е нешто пониска од планираното, се спроведуваат дополнителни активности со цел подобрување на резултатите.
