Осудениот на десетгодишна затворска казна Ремзи Мифтари, одговорен за тешката автобуска трагедија кај Ласкарци во која животот го загубија 16 лица, сè уште не е лоциран од надлежните служби. Иако требаше да се јави во затворот „Идризово“ уште во мај, тој не се појавил, а полицијата не успева да го пронајде на ниту една адреса.
Од КПУ „Идризово“ информирале дека уште на 7 ноември го известиле судијата за санкции во Основниот суд Гостивар дека Мифтари не се пријавил во утврдениот рок според упатниот налог. По таа пријава е издадена наредба за негово присилно спроведување, но досега нема резултати.
Тетовската полиција потврдува дека Мифтари не бил најден во својот дом, но и дека граничните премини не евидентирале негово излегување од државата, што упатува дека најверојатно се крие во внатрешноста на земјата. Претреси и проверки се вршат на повеќе локации.
Судијата за санкции изјави дека по издавањето на наредбата сè уште не добил информации од МВР или од „Идризово“ дека осудениот е пронајден и спроведен.
Истовремено, и газдата на „Дурмо турс“, Дурмиш Белули, кој исто така беше осуден и доби зголемена казна од Апелација, сеуште е на одложување поради медицински причини. И двајцата, Белули и Мифтари, пред неколку месеци подлегнаа на операција од кила на тестиси, по што им беше одобрен привремен одлог на издржување на казната. Белули доби ново продолжување до 1 декември 2025, додека рокот на Мифтари одамна истече.
Иако пресудите станаа правосилни на 9 мај годинава, нивното спроведување оди многу бавно. Апелациониот суд тогаш му ја зголеми казната на Белули од четири на десет години, а на Мифтари од шест на десет години.
Несреќата се случи во 2019 година, кога автобусот со патници излетал на автопатот кај Ласкарци. На лице место загинаа 16 лица, а повеќе од 30 беа повредени.
