(ФОТО) „Треба ли да се случи нова хаварија?“: Крстевски со алармантно предупредување за состојбата во Кочани

Поранешниот в.д. градоначалник на Кочани, Венко Крстевски објави алармантен статус на социјалните мрежи.

Крстевски јавно праша дали лекцијата е научена од трагедијата во дискотеката „Пулс“, каде што 63 лица загинаа, а над 200 беа повредени.

„Што правиме со дивоградбите угостителски објекти во трговски, за кои поднесов кривична пријава пред точно 5 месеци, бидејќи имав саботажа од општинските инспектори?! Треба ли да се случи нова хаварија со човечки жртви за да се постапува? Што значи правда за Кочани, ако лекцијата не е научена?

Извадок од излагање на обвинителот Борче Јанев:

Ако овој објект ги исполнуваше стандардите,

ако вратите беа доволни и проодни,

ако плафонот и ѕидовите не беа обложени со отров што убива побрзо од пламен,

ако имаше функционална вентилација,

ако постоеше противпожарен систем,

ако имаше навремена контрола, надзор и санкција,

— пожарот сам за себе ќе се запаметеше како опасен инцидент, но не и како масовна гробница.

Затоа денес бараме одговорност по име и презиме,

Бараме правда,

Правда, но не заради утеха и одмазда

Правда како последица на незаконитост..

За светлата во дискотеките никогаш повеќе да не го заслепат разумот и за ниту еден лажен сјај, самоволие и привид на контрола и постапување… никогаш

повеќе да не бидат посилни од човечкиот живот. – истакна обвинителот“, пишува Крстевски.

Крстевски во коментар напиша и дека една од дивоградбите е на родител чие дете загина во „Пулс“.