На плоштадот „Македонија“ и кејот во Скопје е забележана употреба на хемиска течност со ознака UN 1760 – „Corrosive Liquid, N.O.S.“, која припаѓа на класа 8 од меѓународниот систем за опасни материи – корозивни супстанци.
Фотографиите и видеото снимени на лице место прикажуваат канистер со јасна хемиска ознака за корозивност, предупредувачки симбол и натпис „опасно за контакт со кожа и метали“. Ова средство, според хемиските стандарди, често се користи во индустриско чистење и може да содржи компоненти како натриум хидроксид или киселини со силно дејство.
Иако е можно оваа течност да се користи во разредена форма, експертите предупредуваат дека контактот со вакви супстанци може да биде штетен за здравјето и околината доколку не се почитуваат сите безбедносни протоколи.
Граѓани кои поминуваат низ центарот велат дека често се чувствува остар мирис и дека чистењето се врши без јасна заштита или предупредувачки ознаки за минувачите.
Надлежните институции досега не се огласиле дали оваа хемикалија е официјално одобрена за користење на јавни површини, ниту дали постои еколошка дозвола за нејзино испуштање во канализација.
