Во напуштените остатоци на Чернобилската зона на исклучување се појави нова мистерија што ги вознемири и научниците и локалното население – дел од уличните кучиња кои живеат во близина на поранешната нуклеарна централа одеднаш добиле светлосина боја на крзното.
Видеа објавени од организацијата Dogs of Chernobyl прикажуваат три кучиња со чудна синкава нијанса како талкаат околу остатоците од реакторот број 4. Тимот, кој со години се грижи за стотиците животни во зоната, вели дека вакво нешто не виделе никогаш досега.
„Веќе сме сведочеле на многу чудни работи во Чернобил, но ова беше навистина единствено искуство“, изјавија од организацијата.
Според нив, кучињата се потомци на милениците што биле оставени при евакуацијата по катастрофата во 1986 година.
Иако на прв поглед делуваат здраво и активно, спасувачите се обидуваат да ги фатат за да утврдат што ја предизвикало ваквата промена. Првичните сомнежи се дека можеби се работи за контакт со некоја хемикалија, а не за последица на радијација.
Научниците веќе со години ги проучуваат животните во Чернобил како пример за тоа како природата се прилагодува на екстремни услови. Истражување на Универзитетот во Јужна Каролина и Националниот институт за човечки геном откри дека ДНК-то на кучињата во зоната има значителни разлики во споредба со оние кои живеат само неколку километри подалеку. Тоа сугерира дека тие можеби се развиваат побрзо – адаптирајќи се на контаминираната околина.
Иако не е потврдено дека радијацијата е директна причина, експертите велат дека токму овие животни може да помогнат човештвото подобро да го разбере влијанието на радијацијата врз живите организми – па дури и да дадат траги за заштита од зрачење во иднина.
Проектот Dogs of Chernobyl, кој започна во 2017 година, обезбедува храна, медицинска нега и стерилизација за околу 700 кучиња што живеат во 30-километарската зона.
И додека Чернобил и понатаму останува симбол на човечка трагедија, овие сини кучиња потсетуваат дека природата има неверојатна способност за преживување – дури и таму каде што човекот одамна се откажал.
