Мицкоски: Македонија е за Европската унија, но без билатерални услови

Премиерот Христијан Мицкоски упати повик до Бугарија да покаже вистинска европска одговорност и зрелост, истакнувајќи дека е потребно целосно почитување на пресудите на Европскиот суд за човекови права.

Тој нагласи дека Македонците кои живеат во Бугарија треба да го остварат своето демократско право да формираат сопствени здруженија, како и да имаат свој претставник во бугарскиот Совет за малцински права.

Во своето обраќање премиерот порача дека е време да се испрати јасна и недвосмислена политичка порака – Македонија стои цврсто зад европските вредности и целосното членство во Европската унија, но без дополнителни билатерални услови.

Дополнително, побара од Европскиот совет конкретни гаранции дека Унијата навистина ја гледа земјата како идно рамноправно членка.

„Нашиот источен сосед мора да покаже европска зрелост и вистински европски вредности и да го почитува меѓународното право кое вели дека пресудите од Судот за човекови права треба да се спроведат и конечно македонскиот народ во Западна Бугарија да го добие тоа што одамна ѝ припаѓа, а тоа е да успеат да се здружат во заедница, а потоа да номинираат свој претставник во министерскиот совет за малцински права во бугарската Влада“, посочи Мицкоски.