Во Прилеп, околу 1.200 ученици од основните и средните училишта се собраа за голем спектакл со македонското знаме, како дел од одбележувањето на 11 Октомври – Денот на Народното востание. Настанот, кој се организира секоја година од 2010 година, го означува почетокот на традиционалните чествувања по повод 84-годишнината од востанието, кои вклучуваат културни програми, свечени обраќања и комеморативни активности низ целиот град.
„Формирањето на знамето секоја година е настан што ги вклучува учениците од осмо и деветто одделение во основните и прва и втора година во средните училишта. За многумина од нив е чест да учествуваат, а догодина ќе се обидеме да вклучиме уште повеќе млади“, изјави Златко Думбалоски, професор по физичко и здравствено образование во ОУ „Добре Јованоски“.
Одбележувањата продолжуваат вечерва со изложба на дела од локални ликовни уметници во Центарот за култура „Марко Цепенков“ од 18:30 часот, а од 19:30 на камената бина на плоштадот „Александрија“ ќе се одржи свечена програма. Градоначалникот Борче Јовчески ќе се обрати пред присутните, а следува и традиционалниот огномет кој го симболизира историскиот напад на полициската станица „Участак“ на 11 Октомври 1941 година, што го означи почетокот на Народното востание против фашизмот. Меморијалниот музеј „11 Октомври“ ќе биде отворен за посетители денес и утре.
Утре, на самиот празник, во центарот на градот ќе се оддаде почит на загинатите борци и дејци пред повеќе споменици, меѓу кои на Методија Андонов Ченто, Кузман Јосифорски-Питу, во Алејата на народните херои, како и пред Могилата на непобедените со моштите на 650 борци од Прилеп и Прилепско.
Во 12:30 часот ќе се одржи Свечена академија во Центарот за култура „Марко Цепенков“, на која ќе учествува премиерот Христијан Мицкоски. Паралелно со културните настани, ќе се одржат и Саем на земјоделски производи, изложба на автомобили, како и традиционална крводарителска акција во просториите на „Црвениот крст“.
