Марија Тасева од Кочани чудесно преживеа пожарот во дискотеката „Пулс“. Во хаосот, меѓу вресоците и пламенот, успеа да излезе надвор, со изгореници и повреди од паничниот бег на луѓето околу неа. Но, радоста од преживувањето беше кратка – во дворот на кочанската болница, Марија ја дочека најстрашната вест: нејзината сестра Лепа загинала во огнот.
„Сестро… твоите најубави години штотуку почнуваа. Се обидов да влезам во дискотеката за да те најдам, но не ми дозволија. Да можев, ќе горев со тебе само за да не бидеш сама. Извини што не можев да те спасам… Секогаш ќе бидеш со мене, моја непреболна рана. Те сакам најмногу.“ – напиша Марија на Инстаграм.
Трагедијата не е нова за семејството. Пред две години, нивната мајка, Танкица Младеновска, беше убиена пред својот дом. Нејзиниот поранешен партнер, Усеин Рашидов, ја нападнал со нож, нанасяјќи ѝ над 40 убоди. Танкица во повеќе наврати пријавувала насилство и закани од него, вклучувајќи и обиди за изнуда, но институциите не успеаја да ја заштитат.
Набргу по нападот, Рашидов беше осуден на доживотен затвор за убиство извршено при родово базирано насилство. Во 2024 година, тој си го одзеде животот во затворот.
Случајот на Танкица и нејзините ќерки ја потсетува јавноста на ранливоста на жените во Македонија кога системот не успева да ги заштити од насилство, но и на храброста на оние кои се соочуваат со трагедија и болка.
