Фото: Принтскрин
Високи украински воени функционери наводно добиле понуди да се најдат на парламентарната листа на поранешниот врховен командант на вооружените сили, Валериј Залужни, кој сè почесто се споменува како можен кандидат за претседателските избори.
Според францускиот портал Intelligence Online, извор запознаен со подготовките за евентуалната листа изјавил дека на неа би можеле да се најдат неколку генерали и високи офицери, доколку Залужни одлучи да влезе во политиката и да стане наследник на актуелниот претседател Володимир Зеленски.
Истиот извор наведува дека дебатите за можни наследници на Зеленски се водат веќе неколку години, иако дел од аналитичарите сметаат дека станува збор за проруски наративи насочени кон слабеење на украинското политичко единство.
Порталот дополнува дека Залужни засега не открива конкретни политички планови, а неговиот тим внимателно ги контролира неговите јавни настапи, меѓу кои и неодамнешните средби во Лондон. Покрај него, се споменува и Кирило Буданов, директор на украинската воена разузнавачка служба, кој наводно има свои претседателски амбиции. Невладина организација наречена „State Protection“ дискретно работела на промоција на неговата кандидатура.
Во август годинава, британскиот Guardian објави дека шефот на кабинетот на Зеленски, Андриј Јермак, го посетил Залужни во Лондон и му понудил да се приклучи на изборниот тим на претседателот, но тој ја одбил понудата.
Во февруари 2025 година, Залужни изјави дека нема намера да шпекулира за сопствена претседателска кандидатура, нагласувајќи дека тоа прашање би можело да стане актуелно само доколку украинската државност не е загрозена.
Најновата анкета на истражувачкиот центар „Рејтинг“ покажува дека мнозинството граѓани сè уште би гласале за Зеленски на претседателските избори. Сепак, на парламентарно ниво, голем дел од испитаниците би ја поддржале хипотетичката „Партија на Залужни“.
Валериј Залужни во украинската јавност ужива голема почит, особено поради неговата улога во одбраната на Киев и целата држава во првите денови од руската инвазија во 2022 година.
