Фото: Принтскрин
Министерството за здравство соопшти дека е потпишан договор за набавка на 80.000 дози вакцини против сезонскиот грип, кои треба да пристигнат во земјава во текот на следната недела. Според најавите, процесот на имунизација ќе започне во втората половина од октомври.
Станува збор за четиривалентни вакцини произведени од компанијата „Абот“ во Холандија. Бесплатната вакцинација е наменета за најризичните категории население – граѓани над 65-годишна возраст, пациенти со хронични заболувања, здравствени работници, бремени жени, деца од шест месеци до пет години, како и корисници и вработени во установи за социјална заштита на стари лица.
Засега Министерството не објави детали за начинот на пријавување и процедурата за закажување вакцинација, а тие информации ќе бидат дополнително соопштени.
