„Објавени се само дел од пораките, се истражуваат и УЈП и други институции“, вели Коцевски

Републичкиот јавен обвинител Љупчо Коцевски изјави дека јавноста досега има видено само дел од материјалите со кои располага обвинителството и дека во нив се содржани уште најмалку десетина потенцијално инкриминирачки дејствија. Тој нагласи дека истрагата е сè уште во тек и дека не е завршена ниту за Управата за јавни приходи, ниту за останатите институции што се споменуваат во случајот.

Оваа негова реакција доаѓа по емитувањето на новиот документарен филм на Истражувачката репортерска лабораторија (ИРЛ), во кој беа прикажани пораки и комуникации што отвораат сериозни сомнежи за злоупотреба на службени позиции. Во филмот се споменуваат синот на сопственикот на дискотеката во Кочани, братот на претседателката на Кривичниот суд Даниела Димовска, како и инспектори кои, според објавените содржини, најавувале претстојни инспекции, примале подароци и го користеле службениот авторитет за лични привилегии, како што е резервирање маси.

Коцевски истакна дека обвинителството детално ќе ги разгледа сите наводи и докази и најави дека јавноста ќе биде навремено информирана за следните чекори во постапката.