Унгарски дипломат: Ние се откажавме од две третини од земјата, Украинците би можеле да останат без петина

Заменик-министерот за надворешни работи на Унгарија, Левенте Маѓар, со своја изјава предизвика внимание во јавноста, откако на предавање во Париз предложи дека Украина можеби треба да размисли за отстапување на дел од својата територија со цел постигнување мир.

Маѓар се повика на Трианонскиот договор од 1920 година, по кој Унгарија изгуби две третини од својата територија по Првата светска војна. Според него, тогашната унгарска влада имала само две опции – повторно да се впушти во војна и да ризикува колективно уништување или да ги прифати тешките мировни услови, иако тоа значело драматично губење на национална територија.

„Мирот е неопходен по секоја цена. Одлуката била болна, но единствено разумна. Денес Украина е во ситуација кога можеби ќе мора да се откаже од една петтина од својата територија. Не кажувам што точно треба да направи Украина, но нашето искуство покажува дека понекогаш мирот подразбира и жртви“, изјави Маѓар.

Тој истакна дека клучното прашање е што е поважно – целосното зачувување на територијата или завршувањето на војната и воспоставувањето мир.