Фото: Орце Ѓорѓиевски - Orce Gjorgjievski
Кандидатот за градоначалник на Скопје од редовите на ВМРО-ДПМНЕ и коалицијата, Орце Ѓорѓиевски, денеска на промотивен настан во Музејот на современа уметност претстави амбициозна програма за првите три дена од неговиот мандат, која тој ја нарече „генералка“ на градот.
Ѓорѓиевски најави низа проекти насочени кон подобрување на урбаната инфраструктура и животната средина. Тој истакна дека ќе се воведе интегриран јавен превоз со нови еколошки автобуси, ќе се изврши целосно реновирање на Универзална сала и киното „Милениум“, како и имплементација на програма „Град без депонии“ и формирање на еко бригади.
Дополнително, кандидатот најави пошумување на градот, создавање на 50 нови мали маалски паркови и активности за подобрување на квалитетот на живот во скопските населби.
„Пред нас е нова страница – на создавање вредности. Скопје мора да биде град во кој сите ќе живеат убаво. Ова не е само моја патека, туку на сите нас. Стојам пред вас не како политичар, туку како човек кој нема да гледа на мандатот како на личен успех, туку како на обврска кон граѓаните“, кажа Ѓорѓиевски.
