Се скарал со три лица, па почнал да пука со пиштол по што прегазил полицаец – притвор за 34-годишен маж

Основното јавно обвинителство во Струга отвори истрага против 34-годишен жител на Велешта поради сомневање за серија тешки кривични дела.

Осомничениот се товари за неовластено изработување, поседување, посредување и тргување со оружје и експлозивни материи, како и за предизвикување општа опасност и напад врз службено лице за време на вршење работи на безбедноста.

„Мажот, на 16 септември, при расправија со три лица од Дебар со кои имал од претходно влошени односи, извадил пиштол кој го поседувал без дозвола и кон еден од оштетените испукал неколку пати во долниот дел од нозете. Му нанел две лесни телесни повреди, а потоа влегол во возилото со намера да избега.

Не ја почитувал наредбата на полициски службеник, кој му наредил да застане и движејќи се наназад со автомобилот го удрил полицаецот на кого исто така му нанел телесна повреда.

При увидот се пронајдени нож и метална шипка, па се преземаат и дополнителни дејствија на проверки  со цел да се испита нивната употреба во настанот“, соопшти Обвинителството.

Јавниот обвинител до судијата на претходна постапка достави предлог за определување мерка притвор за осомничениот.