Бранко и Самир три недели доброволно го чистат каналот до Дојранското езеро

Двајца жители на Нов Дојран, Самир Пајтон и Бранко Караколев, со сопствена иницијатива и без никаква надокнада веќе три недели работат на расчистување на отворениот канал на хидросистемот „Ѓавато“. Опремени со лопати и вили, тие го отстрануваат наталоженото ѓубре, а со моторни тримери ја косат тревата долж целиот канал, кој е изграден пред околу две децении.

Нивната акција се совпадна со тековната санација на хидросистемот. Од минатата недела водата во каналот е прекината, со што се создадени услови за негово чистење и одржување. Премиерот Христијан Мицкоски преку социјалните мрежи информираше дека е завршена првата фаза од санацијата на пумпите во бунарското подрачје и дека наскоро ќе започне втората фаза од овој процес.

Ваквата заложба на Пајтон и Караколев претставува пример за општествена одговорност и лична посветеност кон заедницата.