Во повеќе српски градови синоќа повторно се одржаа масовни протести. Илјадници граѓани излегоа на улиците, а најголемиот дел од собирите се одвиваа пред седиштата на владејачката Српска напредна партија (СНС), кои беа обезбедувани од полициски кордони. На неколку локации дојде до пробивање на кордонот, а полицијата во повеќе наврати употреби солзавец за растерување на демонстрантите.
Во Нови Сад беа оштетени просториите на СНС, а во Белград, пратеникот од Партијата за слобода и правда (ССП), Пеѓа Митровиќ, беше брутално нападнат од група маскирани лица вооружени со палки. Според неговото сведоштво, нападот продолжил и откако се идентификувал како народен пратеник, притоа здобивајќи се со повреди на главата и нозете.
Студентските организации кои учествуваат во блокадите преку социјалните мрежи го обвинија државниот врв дека со намерни провокации се обидува да предизвика внатрешен судир. Тие објавија дека полицијата повторно била на страната на поддржувачите на власта, кои, како што наведуваат, фрлале камења и користеле пиротехника против демонстрантите, а на едно место бил забележан и човек со огнено оружје.
Протестниот бран започна по инцидентите на собирите во Врбас и Бачка Паланка, каде што, според учесниците, полицијата постапила со прекумерна сила. Како одговор, поддржувачи на СНС се појавија пред своите партиски простории во повеќе градови, што доведе до директни судири со граѓаните.
Во Белград, во близина на Правниот факултет, беа приведени неколку лица, а снимките од главниот град прикажуваат сцени на полициска бруталност. Напнато беше и во Ниш, каде што дојде до физички пресметки помеѓу жандармеријата и демонстрантите.
