Фото: Принтскрин
Грција од 13 септември ќе воведе значително построги сообраќајни прописи, кои ќе важат подеднакво за домашните граѓани и странските посетители, вклучително и за бројните патници од Србија, Македонија и другите балкански земји кои патуваат со автомобил до морскиот брег.
Новите измени во законот за сообраќај претставуваат најстроги мерки досега, осмислени со цел да се надминат сериозните слабости на досегашниот систем и да се зголеми безбедноста на патиштата. Особен акцент се става на еден од најчестите прекршоци – користењето мобилен телефон додека се управува возило, што е сè почеста, но и многу опасна навика.
Досега, ваквиот прекршок се казнуваше со привремено одземање на возачката дозвола во траење од два месеци. Но, според новите правила, казните ќе бидат далеку поригорозни – почнувајќи од парична казна од 350 евра и едномесечно одземање на возачката дозвола при прво прекршување. Во случај на повторно прекршување, казната ќе изнесува 1.000 евра, а ќе следува и шестмесечна забрана за управување со моторно возило. Третата прекршочна постапка носи дури 2.000 евра казна и забрана за возење во траење од една година.
Ако пак употребата на мобилен телефон доведе до сообраќајна несреќа, санкциите стануваат уште построги – казна до 4.000 евра и одземање на возачката дозвола на период до осум години. За потешки последици, како тешка телесна повреда или смрт на друго лице, предвидени се и затворски казни – од 10 години за повреда, до 20 години за смртен исход. Во случај на повеќе жртви, можна е и доживотна затворска казна.
Во меѓувреме, и соседна Бугарија ги заостри своите сообраќајни правила, кои веќе стапија на сила од 1 август. Новите прописи се однесуваат на сите учесници во сообраќајот, вклучително и на илјадниците туристи кои ја користат земјата како транзитен пат до Грција. Најголем акцент е ставен на одбивањето да се направи тест за алкохол или психоактивни супстанци – доколку возач одбие проверка по сообраќајна несреќа, може да се соочи со затвор до една година и казна од 1.200 евра.
Покрај тоа, се зголемени и казните за возење под дејство на алкохол. Доколку се утврди над 1,2 промили алкохол во крвта, возачот може да биде казнет со глоба од 500 до 2.500 евра, додека за повторени прекршоци казната може да достигне и до 5.000 евра. Новите мерки предвидуваат и задолжителни правила за управување со скутери – потребни се осигурување, носење заштитна кацига, минимална возраст од 16 години и дозволено возење само во текот на денот. Родителите кои ќе дозволат на децата да ги прекршуваат овие правила ќе бидат казнети со 250 евра.
Дополнително, Бугарија воведе и систем за просечно мерење на брзината со камери, вклучително и на делови со патарини. Доколку се утврди дека возачот ја надминал дозволената брзина за повеќе од 40 км/ч надвор од населено место, следи двомесечно одземање на возачката дозвола и дополнителна парична казна.
