Фото: Денови.мк
Иако црковниот календар го одбележува нејзиниот главен празник на 9 септември, Православната црква на 7 август го чествува Успението на Света Ана – мајката на Пресвета Богородица.
Овој ден има посебно значење за верниците, кои традиционално го посетуваат манастирскиот комплекс посветен на Света Ана, сместен во селото Маловишта, единственото населено место во рамки на Националниот парк Пелистер. Опкружен со недопрената природа и планински мир, манастирот е духовен центар кој привлекува верници од цела Македонија и пошироко.
Се верува дека Света Ана има особена благодат да помогне на брачни двојки кои се соочуваат со потешкотии при добивање потомство. Поради тоа, сè уште е жив обичајот вечерта на 6 август да се преноќи во манастирот, со надеж дека молитвите ќе бидат услишени.
Во непосредна близина на светињата се наоѓа и извор со вода што извира од коренот на стара бука. Таа вода се смета за лековита – верниците се мијат со неа, изговарајќи молитва за здравје, среќа и семеен благослов.
