Фото: Принтскрин
Двајца млади велосипедисти од Исланд се повредени во сообраќајна несреќа што се случила додека тренирале за Европскиот младински олимписки фестивал (ЕМОФ), кој моментално се одржува во нашата земја.
Инцидентот се случил на регионалниот пат Куманово – Свети Николе, во близина на селото Зубовце. Според информациите од Министерството за внатрешни работи, несреќата била пријавена вчера, а се случила во текот на последните подготовки на исландските натпреварувачи пред официјалниот старт на трката што е закажана за денес.
Според првичните сознанија, велосипедистите биле удрени од патничко моторно возило за време на нивната тренинг-сесија. Од ударот, двајцата спортисти се здобиле со телесни повреди и веднаш биле пренесени во најблиската здравствена установа за укажување лекарска помош.
„Вчера во 12:09 часот во СВР Куманово било пријавено дека на регионалниот пат Куманово–Свети Николе, атар на село Зубовце, патничко возило ‘фолксваген пасат’ со кумановски регистарски ознаки, управувано од Н.Б. (42) од Куманово, удрило во двајца малолетни велосипедисти од Исланд, кои се учесници на младинските европски олимписки игри кои се одржуваат во земјава и кои се подготвувале за денешната велосипедска трка“, соопшти МВР.
