Фото: Принтскрин
Премиерот Христијан Мицкоски денеска изјави дека македонската економија бележи значаен напредок, при што истакна повеќе позитивни индикатори кои, според него, укажуваат на стабилен и силен економски раст. Според Мицкоски, земјата се движи во вистинска насока, а резултатите од последните месеци се најдобар доказ за тоа.
„Правиме гигантски чекори во економијата. Во мај бележиме историски раст на индустриското производство од 9,4 проценти. Дополнително, имаме зголемување на извозот на земјоделски производи за 57 отсто во првите пет месеци од годинава, во споредба со истиот период лани. Туризмот исто така се опоравува со сериозно темпо – бележиме раст од 22 отсто на бројот на туристи во првиот квартал од годинава“, изјави Мицкоски.
Тој потсети дека бруто-домашниот производ (БДП) во првиот квартал годинава пораснал за 3,2 проценти во однос на истиот период лани, со што Македонија се најде на четвртото место во Европа, веднаш зад Ирска, Данска и Полска.
„Кога тоа го кажавме, многумина нè исмејуваа. Но, сега можам со сигурност да најавам дека во вториот квартал ќе имаме уште подобар резултат. Очекуваме раст меѓу 4 и 6 отсто, што е навистина голем чекор напред. Првичните показатели за април и мај се исклучително силни и охрабрувачки“, додаде премиерот.
