Фото: Принтскрин
Професорката Мирјана Најчевска повторно го привлече вниманието на јавноста со една од нејзините остри и провокативни објави на социјалните мрежи.
Во своето најново излагање на „Фејсбук“, таа упати жестока критика, оценувајќи го народот со крајно негативна квалификација, нарекувајќи го „глупав“.
„Како професорка, тврдев дека овој народ е глуп како цепаница.
Денес како професор во пензија тврдам дека овој народ е глуп како цепаница.
За разлика од мене, Црвенковски објави дека: Народот е секогаш во право, дури и кога греши и ве опљачка.
Груевски соопшти дека : Народот е тој што одлучува во оваа земја и ве опљачка.
Заев гордо извика: Дојде слободата! Народот е слободен и ве опљачка.
Ковачевски тврдеше дека : Народот остана силен и решителен и ве опљачка.
Мицкоски свечено изјави дека: Ова е победа на народот, цунамито се крена и ве пљачка.
И ете така, како сите добри измамници, додека ве тинтраа и ви продаваа пуфки, дојдовме до тоа да имаме најлошо образование и здравство, да дишеме најзагаден воздух, да бидеме најсиромашни, да имаме најлош судски систем, да имаме најбогати политички партии, пратеници и функционери, да ни горат пациенти и деца, да добиеме партократија наместо демократија. Секоја опозиција ви објаснува дека плаќате најскапа струја, и кога ќе дојде на власт ја поскапува уште малку. И секоја опозиција ве убедува дека тие кои се на власт ве задолжуваат до грло, и кога ќе дојде на власт зема уште неколку кредити. И секоја опозиција ве убедува дека сите кои го прекршиле законот ќе одговараат и кога ќе дојде на власт ќе ги осуди гајтанот за струја и Перо клучарот.
Кога јас го испопцув народот и реков дека е глуп како цепаница затоа што дозволува да биде мамен и лажен и краден, ми рековте дека не и личи на професорка да шири говор на омраза против сопствениот народ.
Еве и по 30 години го тврдам истото. Овој народ е глуп ко цепаница.
Трерба да си навистина многу глуп за да дозволуваш одново и одново да те фаќаат на иста финта, да ти продаваат исти приказни и да очекуваш дека еве сега, овој пат ќе биде поинаку.
Дајте бре луѓе отворете ги очите и не дозволувај те да си играат мајтап со вас“, објави Начевска.
