Одморалиштето „Пониква“ ќе стане центар за рехабилитација на повредените во пожарот во дискотеката

Владата планира следната недела да донесе одлука со која одморалиштето „Пониква“ ќе биде ставено на располагање на Министерството за здравство, за потребите на продолжена медицинска нега и рехабилитација на лицата повредени во неодамнешниот трагичен пожар во Кочани.

Според изјавата на владината портпаролка, Марија Митева, објектот располага со 27 соби и вкупен капацитет од 56 легла, што го прави соодветен за сместување и третман на пациенти во посттрауматска фаза. Таа нагласи дека природната околина, чистиот воздух и мирната локација на „Пониква“ претставуваат идеални услови за физичко и психолошко закрепнување.

„Станува збор за пациенти кои се веќе стабилизирани, но имаат потреба од понатамошен третман и нега. Тие ќе бидат распоредени во неколку групи, со персонализиран пристап кон секој од нив“, кажа Митева.