Пред Соборниот храм „Св. Климент Охридски“ во Скопје денеска осамна транспарент со пораката: „Дедо Стефан, слушни го народот – Партениј за митрополит“, како дел од сè поизразеното незадоволство кај дел од верниците во пресрет на изборот на нов митрополит на Дебарско-кичевската епархија.
Пораката е јавно упатена до Архиепископот охридски и македонски г.г. Стефан, кој неодамна официјално го номинираше монахот Георгиј за оваа висока црковна должност.
Предлогот веќе е доставен до членовите на Светиот архиерејски синод, а изборот е најавен за 12 јуни. Монахот Георгиј, односно Ѓоко Ѓоргевски, беше замонашен на 27 мај, а само неколку дена потоа доби и свештенички чин – што предизвика бура од реакции.
