„Во договорот со Велика Британија нема одредба за мигрантски кампови во Македонија“, вели Николоски

Вицепремиерот и министер за транспорт и врски, Александар Николоски, вечерва најави дека следната недела во Лондон ќе биде потпишан Договорот за стратешко партнерство меѓу Македонија и Обединетото Кралство. Соработката ќе се формализира преку модел „Влада со Влада“, што според Николоски, претставува значаен чекор напред во билатералните односи.

Во интервју за вестите на ТВ Сител, Николоски беше запрашан за шпекулациите кои се појавија во јавноста во врска со наводни планови за отворање на кампови за мигранти одбиени за азил во Велика Британија. Тој категорично ги демантираше овие тврдења, нагласувајќи дека сите услови поврзани со договорот биле одамна усогласени и преговорите се веќе завршени.

„Во договорот нема ништо што се однесува на такви кампови. Најдобро објаснување даде и самиот британски амбасадор, кој јасно истакна дека таква работа не постои. Наша обврска останува заедничката соработка во борбата против организираниот криминал, корупцијата и незаконската миграција – ништо повеќе од тоа,“ изјави Николоски.