Ахмети го нападна Мицкоски: Албанците се над 30%, нема да бидеме слуги во својот двор

На синоќешниот масовен собир во скопската општина Арачиново, лидерот на Демократската унија за интеграција, Али Ахмети, ја заокружи серијата мобилизациски активности на партијата со говор во кој потенцираше дека Албанците се нераскинлив дел од државата и заслужуваат целосна рамноправност во нејзиното управување.

„Ние не ја носиме државата со себе – ние имаме природно и легитимно право да учествуваме во нејзиното водење. Тоа ни припаѓа! Албанците сочинуваат над 30% од населението, живеат на своите огништа и се длабоко вградени во темелите на оваа земја“, изјави Ахмети пред големиот број присутни.

„Јавно го прашувам господинот Мицкоски: Зошто се менува Законот за употреба на јазиците? Зошто се преиспитува Охридскиот договор? Зошто се доведува во прашање стабилноста и безбедноста на државата? Ние не бараме Голема Албанија, ниту Голема Србија, ниту Голема Бугарија – туку Голема Европа без граници, како што направија Германија и Франција“ – порача Ахмети.