Фото: Ракометна Федерација на Македонија
Македонската ракометна репрезентација запиша историска победа во Талин, совладувајќи ја Естонија со убедливи 36-17, што претставува највисока гостинска победа во нашата репрезентативна историја.
Со импресивна игра во двата правци, избраниците на селекторот Кире Лазаров не оставија простор за изненадување. Најефикасен на теренот беше Филип Кузмановски со 6 погодоци, додека Мартин Серафимов запиша 5, а Лазаревски се вклучи со 4 гола.
Голманската линија беше посебно доминантна – Никола Митревски одлично го започна натпреварот со 7 одбрани во првото полувреме, додека Томовски блесна во вториот дел со 13 успешни интервенции.
Следниот предизвик за нашите ракометари е пресметката со Литванија, која ќе се одигра во Скопје, в недела со почеток од 18:00 часот. Победа на овој натпревар ќе значи нов пласман на Европско првенство и продолжување на традицијата на учество на големите континентални собири.
