Фото: Принтскрин
Основното јавно обвинителство Скопје покрена кривична постапка против едно лице осомничено за кривично дело – Предизвикување општа опасност, казниво по член 288, став 1 од Кривичниот законик на Република Македонија.
Според наводите од истрагата, на 2 мај, во раните утрински часови, осомничениот намерно предизвикал пожар на две локации – во викенд-куќа во селото Катланово и во стан лоциран во Скопје. Двата објекта се во сопственост на неговата сопруга, со која бил во бракоразводна постапка и од која бил веќе одвоен. Со ваквото дејствие, тој свесно создал сериозна закана по животот и безбедноста на луѓето.
Според обвинителството, осомничениот еден ден пред настанот упатил телефонски закани до сопругата и нивниот заеднички син. И покрај сознанието дека неговите постапки може да имаат тешки последици, тој се согласил со нивното настанување. На критичниот ден, првин се упатил кон викенд-куќата во Катланово, каде што со бензин запалил оган пред влезната врата, кој брзо се проширил и во внатрешноста на објектот, предизвикувајќи значителна материјална штета.
Потоа, осомничениот заминал за Скопје и на сличен начин предизвикал пожар пред влезната врата од станот на оштетената, продолжувајќи го сериозното загрозување на животната и имотната сигурност.
