Фото: Принтскрин
Министерот за внатрешни работи, Панче Тошковски, денеска официјално ја потврди автентичноста на информациите што ги објави СДСМ, поврзани со сериозен инцидент во полицијата.
Според внатрешните проверки на МВР, братот на градоначалникот на Гази Баба, Деан Стефковски, бил запрен од полициска патрола во централното градско подрачје на Скопје, возејќи со брзина од 84 километри на час на делница каде што максималното дозволено ограничување е 50 километри на час.
Министерот објасни дека додека полицајците подготвувале казнена пријава, запрениот возач стапил во контакт со полициски началник, кој, преку телефонски разговор, им наредил на службениците да го ослободат.
Откако му било укажано дека пријавата веќе е изготвена, началникот наводно побарал од полицајците да ја променат пријавата, заменувајќи го името на прекршителот со друго лице. Според наодите, полицајците ја прифатиле таа наредба и ја измениле документацијата.
