Фото: Принтскрин
Премиерот Христијан Мицкоски нагласи дека Владата е обврзана да го почитува законот и дека доследно го применува во сите свои одлуки.
„Како Влада, мораме да ги почитуваме законските одредби и тоа го правиме. Дали на некого тоа му се допаѓа или не, тоа е веќе прашање на личен став,“ истакна Мицкоски. Тој додаде дека лично би сакал минималната плата да изнесува и 1.000 евра, оценувајќи дека дури и таа сума можеби би била недоволна во денешни услови.
„Верувам дека зголемувањето на минималната плата би резултирало со повисоки приходи во Буџетот. Но, прашањето е дали стопанството може да го издржи таквиот товар – тоа треба да го одговорат работодавачите,“ додаде тој.
Мицкоски најави дека веднаш по формирањето на Економско-социјалниот совет ќе биде свикана седница на која ќе се разговара за висината на минималната плата. Ако работодавачите и работниците постигнат согласност, Владата е подготвена да интервенира во законската регулатива за да ги усогласи промените.
