(Видео) Марко пред нов предизвик – со пливање, трчање и велосипед ќе помине 106,8 км

Марко Пејчиновски повторно се враќа на големата сцена, подготвен за нова животна авантура која ја надминува физичката издржливост – и ја тестира волјата до крајни граници. Овојпат, неговиот нов предизвик носи едно име – „IRONMAN TRIATHLON“, но со уникатна македонска траса.

Станува збор за екстремна дисциплина која комбинира три спортски елементи – трчање, велосипедизам и пливање – сето тоа во една целина долга вкупно 106,8 километри.

Пејчиновски ќе го започне предизвикот со маратонско трчање од 42,2 километри, од манастирот Св. Наум до градот Струга. Потоа, ќе се врати назад кон Св. Наум, но со велосипед, поминувајќи уште 42,2 километри. За финале, ќе го совлада најтешкиот дел – пливање 22,4 километри низ водите на Охридското Езеро, сè до крајната дестинација – градот Охрид.