Во успешно координирана интервенција на повеќе надлежни институции, беше спасена мечка која се најде во криволовна замка во реонот помеѓу селата Љубојно и Брајчино, во општина Ресен. Настанот бил пријавен преку националниот број за итни повици – 112, по што надлежните служби веднаш реагирале на терен.
Со брза и ефикасна акција, екипите пристигнале на местото и спровеле внимателна операција за ослободување на животното.
„Пријавителот претпоставил во пријавата дека најверојатно се работи за мечка поради гласното рикање што се слушало во непосредна близина на мостот на Брајчинска Река. За оваа ситуација, од страна на ЦУК веднаш е известена Гранична полиција Маркова Нога, Полициска станица Ресен, Концесионерот – ловното друштво и други субјекти за понатамошно постапување. По интервенцијата на надлежните служби од Концесионерот -Ловното друштво, со присутен ветринар, од НП „Пелистер“ и од полицајци од МВР мечката е успиена и безбедно ослободена“, соопштија од ЦУК.
