Претседателот на Бизнис-конфедерацијата на Македонија, Миле Бошков, која е дел од Економско-социјалниот совет, денеска се осврна на предлогот на Сојузот на синдикати на Македонија (ССМ) за зголемување на минималната плата на 500 евра, со субвенционирање од страна на Владата. Бошков нагласи дека за ова прашање се неопходни детални разговори и дека острата реторика меѓу Владата и синдикатите не придонесува кон наоѓање на заедничко решение.
„Во минатото имавме сличен предлог, но по неформални разговори со претставници на Владата, сфативме дека не можеме да очекуваме поддршка за зголемување на социјалните придонеси. Поради тоа, мораме да се придржуваме кон законските решенија што се веќе во сила. Со години наназад инсистираме на колективно договарање во сите сектори, бидејќи веруваме дека дијалогот е клучен за постигнување на значително повисоки плати, а не само за минималната“, истакна Бошков.
Тој додаде дека Владата јасно ставила до знаење дека е време работодавачите и синдикатите самостојно да дојдат до компромис, без да се потпираат исклучиво на државни интервенции.
„Дијалогот мора да се води врз основа на реалните економски услови. Се соочуваме со различни деловни предизвици низ земјата – микро, малите и индивидуалните претприемачи немаат исти можности за зголемување на приходите и платите. Реалноста е дека повеќе од 20.000 луѓе се самовработени, а за да си ја зголемат платата, мора сами да генерираат поголем профит, што не е секогаш едноставно“, појасни Бошков.
Тој исто така се осврна на проблемот со ниската продуктивност во македонските компании, посочувајќи дека ова е еден од главните фактори што ја ограничуваат можноста за покачување на платите.
„Разбираме зошто минималната плата од 24.400 денари е недоволна за пристоен живот, но искуството покажува дека кај голем број работодавачи сè уште не постои системски пристап за мерење на продуктивноста. Компаниите во најголем дел немаат развиени методи за оптимизирање на работниот процес, што сериозно го ограничува нивниот капацитет за зголемување на платите“, потенцираше Бошков.
