Талат Џафери од Европскиот фронт се јави на седницата на Собранието, каде што се дискутираше за разрешување на членовите на Судскиот совет, и му укажа на актуелниот претседател Африм Гаши дека не е во согласност со законските одредби да се разрешуваат членови именувани со Бадентерово мнозинство само со обично парламентарно гласање.
„Претседателот Гаши настојува да разреши членови на Судскиот совет кои беа избрани со најмалку 61 глас, плус Бадентерово мнозинство. Сега, без примена на истите критериуми за двојно гласање, се предлага нивно разрешување. Како претседател на Собранието, Вие треба да бидете свесни дека Законот и Уставот јасно предвидуваат дека разрешувањето мора да се одвива на ист начин како и изборот. Овие членови се именувани со посебна процедура, а сега сакате да ги отстраните со обично мнозинство“, изјави Џафери, изразувајќи несогласување со ваквиот пристап.
На ова реагираше претседателот на Собранието, Африм Гаши, нагласувајќи дека станува збор за различен процес.
„Не е во ред поранешен претседател на Собранието да се вклучи во дебата за дневниот ред, а притоа да зборува за нешто сосема друго. Би требало да знаете дека во овој случај не се работи за разрешување, туку за интерпелација“, одговори Гаши.
