Здружението „Анимал Лаверс“ – Струмица со голема загриженост ја известува јавноста за бруталното убиство на кучето Рекс, кое на 27-ми минатиот месец било застрелано со огнено оружје во селото Муртино, во струмичкиот регион.
Според информациите добиени од полицијата, утврдено е дека сторителот на овој грозоморен чин е малолетно лице, а случајот е веќе проследен до Јавното обвинителство за понатамошна постапка.
За „Анимал Лаверс“, овој настан отвора сериозни прашања за општествената безбедност, но и за недостигот на ефикасни механизми за заштита на животните од насилство. Организацијата апелира надлежните институции да преземат строги мерки за санкционирање на ваквите постапки и бара зголемена контрола и превенција за спречување на слични инциденти во иднина.
„Како е возможно малолетник да поседува и да ракува со огнено оружје? Дали во семејството на сторителот децата се учат да користат оружје? Дали надлежните институции ќе дозволат ова злосторство да помине неказнето? Каква порака се испраќа до идните генерации доколку ваквите случаи останат без соодветна правна разрешница?“, прашуваат од Здружението.
