Вчера на гробиштата во Белград беше погребан Саша Поповиќ, основачот на „Гранд“. Пред погребната церемонија, во негова чест беше одржана комеморација во Сава Центар, каде што бројни пријатели, колеги и соработници се собраа да му оддадат последна почит.
Меѓу оние кои со емоции зборуваа за Поповиќ беше и Цеца Ражнатовиќ, која не можеше да ги задржи солзите додека споделуваше спомени за нивното пријателство.
„Сè уште не можам да прифатам дека го нема. На сите ни е многу тешко, а на комеморацијата бев скршена. Тоа се моменти кога сфаќаш дека никогаш повеќе нема да ја видиш таа личност, да ја прегрнеш, да разговараш со неа. Тешко е да се соочиш со таква загуба,“ изјави Цеца.
Таа откри дека се допишувала со Поповиќ само два дена пред неговата смрт, кога тој уште еднаш ѝ покажал колку значело нивното пријателство.
„Последно што му напишав беше: ‘Како си?’ и ‘Те сакам’. Тој ми одговори: ‘Ти благодарам, драга, лошо е.’ Дури и во тие моменти ми врати на пораката, што само покажува колку вистинска беше љубовта и пријателството меѓу нас,“ додаде пејачката.
