Европската унија останува клучен сојузник и најголем економски партнер на Македонија, а поддршката за членството во ЕУ се зголемила на 62%, што претставува прв пораст по четири години опаѓање, објави „Сител“.
Сепак, оваа поддршка не се рефлектира врз уставните измени. Според истражувањето на Институтот за демократија, само 20% од граѓаните се согласуваат со внесувањето на Бугарите во Уставот, додека исто толку сметаат дека преговорите треба да запрат или дека треба да се промени преговарачката рамка. Поддршката за ЕУ е најголема кај лицата на возраст од 35 до 54 години, додека младите до 24 години повеќе се залагаат за зајакнување на односите со Кина. Постарата популација над 65 години, пак, гледа поголема потреба од соработка со Русија.
Евроамбасадорот Рокас ја оцени високата поддршка за ЕУ како охрабрувачка, како и неодамнешната средба меѓу министрите за надворешни работи на Македонија и Бугарија, особено во контекст на европските безбедносни предизвици.
Антонио Милошоски од ВМРО-ДПМНЕ истакна дека Македонија не треба повторно да го менува Уставот без конкретни гаранции дека евроинтегративниот процес ќе напредува. Тој нагласи дека владата ќе бара такви гаранции од Брисел, Софија и Вашингтон. Според него, земјата веќе имала негативно искуство со уставните измени поврзани со името, што оправдува барање за поголема извесност во пристапниот процес кон ЕУ.
Истражувањето покажува дека поддршката за членство во ЕУ се зголемила и кај симпатизерите на ВМРО-ДПМНЕ, од 43% во 2023 година на 55% во 2024. Сепак, само 4% од нив поддржуваат уставни измени, додека поддршката меѓу симпатизерите на СДСМ, ДУИ и ВРЕДИ се движи од 45 до 60%.
Анкетата е спроведена теренски од 25 октомври до 4 декември минатата година врз репрезентативен примерок од 1056 испитаници велат од „Сител“.
