Министерството за енергетика, рударство и минерални суровини соопшти дека е усвоена Програмата за заштита на ранливи потрошувачи на енергија за 2025 година.
Оваа програма има за цел да обезбеди директна финансиска поддршка, како и дополнителни мерки за помош на најзагрозените категории граѓани, со што ќе се олесни пристапот до енергетските ресурси за домаќинствата во социјален ризик.
Секое од овие домаќинства, доколку ги исполнува критериумите, ќе може да добие субвенции за намалување на месечните трошоци за електрична енергија во износ од 1.000 денари месечно.
Ослободувањето од дел од сметката за струја ќе се применува во текот на 12 месеци, а за оваа поддршка граѓаните ќе може да аплицираат со поднесување барање до Министерството. Јавниот оглас за пријавување ќе биде објавен наскоро на официјалната веб-страница на Министерството www.energy.gov.mk, како и во два дневни весника.
