На денешната собраниска седница не помина предлог-законот предложен од пратениците на Левица, кој предвидуваше намалување и ограничување на патните трошоци за народните избраници.
По обраќањето на пратеникот Амар Мециновиќ, претседателот на Собранието, Африм Гаши, го стави предлогот на гласање за негово усвојување по скратена постапка.
Меѓутоа, од вкупно 100 присутни пратеници, само 23 учествуваа во гласањето – 22 гласаа „за“, еден беше „против“, додека останатите не го искористија своето право на глас. Со оглед на недоволниот број гласови, предлог-законот не беше усвоен.
Според актуелната методологија, пратениците добиваат надоместок за патни трошоци во износ од околу 1.700 денари за секои извозени 100 километри, плус трошоците за патарина. Опозициската партија предложи овој модел да биде заменет со пресметка базирана на потрошувачката на 6,5 литри гориво на 100 километри, што би изнесувало приближно 500 денари.
