Основниот суд во Штип денеска донесе пресуда со која Фадил Зејнелов е осуден на доживотен затвор за свирепото убиство на 29-годишната Емилија Пешева, кое се случи на 1 ноември минатата година.
На претходното рочиште, одржано пред два дена, обвинетиот ја призна вината, наведувајќи дека мотив за убиството било сомневање за неверство. Неговото признание не ја промени одлуката на судот, кој го осуди на најстрогата казна, имајќи предвид тежината на делото и околностите во кои е извршено.
Обвинителството и правните застапници на семејството Пешеви побараа доживотен затвор, истакнувајќи дека убиството е извршено во контекст на семејно насилство, што го квалификува како фемицид – убиство мотивирано од родова основа.
Според доказите собрани од Основното јавно обвинителство, утврдено е дека на кобниот ден, 1 ноември 2024 година, Зејнелов со умисла ја лишил од живот својата невенчана партнерка, вршејќи при тоа семејно насилство.
